M'BUSA AGWIDWA KAMBA KOGWILIRA MZIMAYI WA MISALA

M'BUSA AGWIDWA KAMBA KOGWILIRA MZIMAYI WA MISALA    Apolisi ku Dowa amanga m`busa wina yemwe ndi mzika ya dziko la Democratic Republic of Congo wa kumalo osungirako anthu othawa kwawo a Dzaleka  m’bomalo kamba komuganizira kuti adagwirila mzimayi wamisala. Ofalitsa nkhani za apolisi ku Dowa Constable Godfrey Kaponda atsimikiza za nkhaniyi ndipo ati  m’busayo Emanuel Bachenezi wa zaka 28 wa Mpingo wa Integrity Family Church ku Dzaleka komweko, ndipo amachokera m`dera la Bukavu m`dziko la Democratic Republic of Congo (DRC). Iye akumuganizira kuti anagwilira mzimayi wa zaka 26 zakubadwa yemwe amachokeranso dziko la Democratic Republic of Congo m’mwezi wa October chaka chatha,ndipo pano ndi woyembekezera. “M’busayo anapita ku nyumba kwa mzimayiyu kukamupemphelera kuti achire matenda amisala . M’busa Bachengezi  adanamiza zimayiyu kuti Mulungu wamuonetsa kuti mayiyu amwe mankhwala anayi nthawi imodzi osati amodzi monga momwe adamulangizira ku chipatala”, watero Kaponda.  Izi akuti  zidachititsa kuti zimayiyu agone tulo tofa nato ndipo m’busayo adapeza mwayi womugwirila. “M’busayo adagona kunyumba ya mayiyu ndipo atafunsidwa m’mawa iye adauza mayiyo kuti amamuchotsa ziwanda  za mwamuna wake yemwe adamwalira kalekale”,watero mneneli wa a polisiyu. Poopa kumangidwa m’busayo adanamiza  mzimayiyu kuti amukwatira koma patatha masabata angapo  mayiyu adatengera nkhaniyi ku bwalo la First Grade Magistrate. “Bwaloli linati mlanduwu ndi wa pa chiweniweni ndipo m’busayu amayenera ku kumupepesa mzimayiyu”,watero Kaponda. M’busayu akuyembekezeka kukayakha mlandu wogwilirira zomwe zikusemphana ndi gawo 139 la malamulo oweruzira milandu dziko lino .